Tala'aga o le Ulua'i Ekalesia Fa'apotopotoga a Samoa (EFKS) i Niu Sila.
Talafa'asolopito
EFKS Grey Lynn
1962 ma luma mai
Le āmataga
O le Ekalesia Fa’apotopotoga Kerisiano i Samoa (EFKS) i Niu Sila na fa’atuina i se vaitaimi na aga’i atu ai le tele o aiga Samoa i Niu Sila e saili manuia. Ina ia fa’aauau le latou fa’atuatua ma a’oa’oga fa’aleagaga ae maise le tausisia o le gagana Samoa ma le fa’asaoina tu ma aga fa’aleaganu’u.
I le aso 29 Tesema 1962, na potopoto ai le toʻa sefuluono Samoa i le 169 Nelson Street, Ponsonby, Aukilani, e fa’atūina aloa’ia le ulua’i Ekalesia EFKS i Niu Sila. O le latou fa’amoemoe o le fa’avaeina lea o se nofoaga tapua’i mo Samoa i Niu Sila, ma fa’aauau pea feso’ota’i ma le misiona lautele a le EFKS i Samoa. O le aulotu, ua tā’ua nei o le EFKS Grey Lynn, ua avea ma nofoaga autu tāua mo le fa’aleagaga ma fa’aleaganu’u o tagata Samoa i Aukilani.
O le ulua’i taitai’iga o le ekalesia na aofia ai le Afioga Fuimaono Konesane E P Fuimaono o le Ta’ita’ifono, Sooalo Mafola Loli Timaloa o le Failautusi, ma Faititilipatasi Fuimaono o le Teutupe. I le aso 30 Tesema 1962, na ta’ita’iina ai e Faife’au Ekepati Laeilua le ulua’i sauniga lotu i le Druids Hall i Aukilani. A’o fa’atupula’ia le fa’apotopotoga a le EFKS Grey Lynn, ua avea le Ekalesia ma nofoaga autu mo fonotaga ma tapua’iga a tagata Samoa i Aukilani.
I le aso 9 o Novema 1963, na fa’apaleina aloa’ia ai le EFKS Grey Lynn i lona nofoaga fou i le 56 Sussex Street, Aukilani. O le Susuga i le Faife’au Siaosi Ieriko ma lona faletua, Fuafuaga Ieriko, na tofia i le aso 14 o Tesema 1963, ma amata le la pulega e tusa ma le tolu sefulu tausaga mai le 1963 i le 1991. O le lāua taitai’iga na taua tele i le fa’atupulaia ama le fa’amautuina o le aulotu āmata, ma avea ai le EFKS Grey Lynn ma nofoaga autu mo agaga ma fa’amautuina o le aganu’u mo Samoa i Aukilani.
I le 1992, na tofia ai le Susuga i le Faiffeagaiga o Ioritana Tanielu ma lona faletua o Lonise Tanielu, e taitaiina le aulotu. Na fa’aauau ai le lāua auaunaga se’ia o’o i le 2011, na fa’atumauina ai le fa’alapotpotoga aulotu Samoa. I le 2012, na tōfia ai le Susuga i le Fa’afeagaiga o Dr. Peniamina Leota ma lona faletua ia Sinatala Leota, na ta’ita’ia le aulotu i lona 50 tausaga talu ona fa’avae ma fa’aauauina pea lona tala’aga se’ia o’o i le fa’amanatuina o le 60 tausaga i le 2022.
Tuputupu A'e ma le Tofiga o le Tala'aga
I le gasologa o tausaga, ua fa’atupula’ia le EFKS Grey Lynn fa’atasi ma Sāmoa i Niu Sila. Ua āvea le aulotu ma vaega tāua i le fa’asaoina o le gagana ma le aganu’u Samoa, aemaise lava mo tupulaga talavou o lo’o ola a’e i se si’osi’omaga e fa’aaogaina le gagana Peretania i taimi uma. O ana fa’atinoga e aofia ai sauniga lotu i le gagana Samoa, tausamiga fa’aleaganu’u, ma polokalame a’oa’oga.
O le mānuia o le EFKS Grey Lynn na avea ai ma fa’avae mo isi fa’apotopotoga EFKS i Niu Sila. I aso nei, e tusa ma le 73 ekalesia EFKS i le atunu’u, ma ua silia ma le 30,000 tagata o lo’o auai ai. E tumau pea le olaola ma le mālosi o le EFKS Grey Lynn, ma fa’aauau pea ana auauna mo Sāmoa i Niu Sila.
Mataaga Aoga Amata (MAA)
O le Mataaga Aoga Amata (MAA) e iai i lalo o le fa’amalu a le EFKS Grey Lynn. Na fa’avaeina i le 2000 ina ia tu’uina atu ai fānau Sāmoa i Niu Sila se a’oa’oga e fa’avae i luga o le gagana Samoa, aganu’u, ma fa’avae fa’a-Kerisiano.
O le igoa “Mata’aga” e fa’atatau i se nofoaga e fa’amanatuina pe fa’ailogaina ai se tulaga fa’apitoa, ma avea ma nofoaga tāua mo Sāmoa. I le tala fa’asolopito, e fa’atatau i le ulua’i nofoaga na fa’apotopoto ai ni Sāmoa i Ponsonby. Ua avea Mata’aga Aoga Amata ma se fa’ailoga tāua mo āiga Sāmoa, e fesoasoani i le a’oa’oina o fānau i Niu Sila ina ia fa’atumauina le poto i le fa’aleaganu’u ma le gagana Sāmoa a’o saunia i latou mo le lumana’i.
Le Komiti Fa'afoe
O le Mata’aga Aoga Amata e iaia i lalo o le Komiti Fa’afoe latou te fa’amautinoa o lo’o fa’atinoina pea le misiona o le a’oga e lagolagoina atina’e ma a’oaa’oga fa’aleaganu’u ma a’oa’oga a fānau. O lenei komiti e aofia ai sui o le o le Aulotu, e aofia ai sui o le Trust a le Ekalesia, le Fa’apotopotoga, le aufaigaluega, ma le Asosi a Mātua ma Faia’oga (PTA).
O a lātou taumafaiga fa’apa’aga e fa’amautinoa ai o lo’o fa’aauau pea ona fa’ataunu’uina e le MAA mana’oga fa’aleaoa’oga ma fa’aleaganu’u a fānau ma o latou aiga, a’o tausisi i le fa’avae ma le fuafuaaga a le EFKS Grey Lynn.
Sui o le Komiti Fa’afoe mo le 2023-2024
Teutupe
Sui o le Aufaigaluega/Pule Aufaigaluega
Sui o le Ekalesia
